اسلام آباد میں وفاقی حکومت نے سیکیورٹی اور انتظامی وجوہات کے باعث پیر 20 اپریل کو ریڈ زون میں قائم تمام سرکاری دفاتر کے لیے ورک فرام ہوم کا اعلان کر دیا ہے۔
کابینہ ڈویژن کی جانب سے جاری نوٹیفکیشن کے مطابق ریڈ زون میں موجود تمام وزارتوں، ڈویژنز اور دیگر وفاقی اداروں کے افسران و ملازمین گھر سے اپنے فرائض انجام دیں گے۔ ملازمین کو ہدایت کی گئی ہے کہ وہ اپنے اسٹیشن پر موجود رہیں اور ضرورت پڑنے پر فوری دفتر پہنچنے کے لیے تیار رہیں۔
اعلامیے میں کہا گیا ہے کہ سرکاری امور کی بلا تعطل انجام دہی کے لیے تمام ضروری انتظامات مکمل کر لیے گئے ہیں۔
دوسری جانب ضلعی انتظامیہ نے بھی ریڈ زون کے اندر واقع تعلیمی اداروں کو 20 اپریل کو بند رکھنے کا فیصلہ کیا ہے جبکہ اسکولوں کو آن لائن یا متبادل تدریسی نظام اپنانے کی ہدایت جاری کی گئی ہے۔
ادھر ورک فرام ہوم کے فیصلے کے بعد الیکشن کمیشن میں آج کے لیے مقرر تمام کیسز بھی ملتوی کر دیے گئے ہیں ترجمان کے مطابق نئی تاریخوں کا اعلان بعد میں کیا جائے گا۔