حیدرآباد کے علاقے اولڈ وحدت کالونی میں واقع گڈو چوک کے قریب ریلوے ٹریک ٹوٹنے کے باعث ایک بڑا حادثہ ٹل گیا۔
ریلوے حکام کے مطابق ٹریک مال گاڑی کی آمد سے قبل دو حصوں میں تقسیم ہو گیا تھا، تاہم ڈرائیور نے بروقت کارروائی کرتے ہوئے ٹرین کو روک لیا، جس سے ممکنہ ڈی ریلمنٹ (پٹری سے اترنے) کا واقعہ پیش آنے سے بچ گیا۔
حکام کا کہنا ہے کہ اطلاع ملتے ہی ریلوے کا تکنیکی عملہ فوری طور پر موقع پر پہنچا اور مرمتی کام شروع کیا، جس کے بعد متاثرہ ٹریک کو بحال کر دیا گیا ہے۔
ریلوے ذرائع کے مطابق ٹریک کی مرمت کے بعد ٹرینوں کی آمد و رفت دوبارہ معمول پر آ گئی ہے۔ واقعے کی وجوہات جاننے کے لیے انکوائری بھی شروع کر دی گئی ہے۔