احتساب عدالت لاہور نے صاف پانی کمپنی کیس میں اہم پیشرفت کرتے ہوئے وزیراعظم شہباز شریف کی صاحبزادی رابعہ عمران اور داماد عمران کے ریڈ وارنٹس معطل کرتے ہوئے انہیں سرینڈر کرنے کا حکم دے دیا ہے۔
سماعت کے دوران عدالت نے دونوں ملزمان سے متعلق جاری اشتہاری قرار دینے کے احکامات میں بھی نرمی کی، اور ان کے ریڈ وارنٹس کو معطل کردیا۔
عدالت کے جج رانا محمد عارف نے تحریری فیصلہ جاری کرتے ہوئے قرار دیا کہ ہر شہری کو منصفانہ ٹرائل (Right to Fair Trial) کا حق حاصل ہے۔ فیصلے میں یہ بھی یاد دلایا گیا کہ مارچ 2021 میں دونوں افراد کو اشتہاری قرار دیا گیا تھا۔
عدالتی حکم کے بعد کیس کی آئندہ کارروائی میں ملزمان کی پیشی اور قانونی تقاضوں کی تکمیل کو یقینی بنانے کی ہدایت کی گئی ہے۔