نیپرا حکام نے واضح کیا ہے کہ ایسے سولر صارفین جو نیشنل گرڈ سے منسلک نہیں ہیں ان کے لیے کسی لائسنس کی ضرورت نہیں اور اس حوالے سے کوئی نئی تجویز بھی زیر غور نہیں۔
نیپرا کے مطابق آف گرڈ سولر سسٹمز پر موجودہ ریگولیشنز لاگو نہیں ہوتے جبکہ قوانین کا اطلاق صرف نیٹ میٹرنگ اور نیٹ بلنگ صارفین پر ہوتا ہے جو نیشنل گرڈ سے منسلک ہوں۔
حکام نے بتایا کہ نئے ریگولیشنز میں نیٹ بلنگ کا نظام متعارف کرایا گیا ہے، جبکہ گرڈ سے منسلک سولر صارفین کے لیے لائسنسنگ کے قواعد میں بھی تبدیلی کی گئی ہے۔
نیپرا کے مطابق 25 کلوواٹ اور اس سے کم سسٹمز کے لیے بھی اب لائسنس جاری کیا جائے گا جس پر ایک ہزار روپے فی کلوواٹ فیس مقرر کی گئی ہے۔ اس سے قبل یہ منظوری ڈسٹری بیوشن کمپنیوں کے ذریعے دی جاتی تھی اور کوئی فیس نہیں لی جاتی تھی۔