وزارتِ پیٹرولیم نے مشرقِ وسطیٰ میں بڑھتی ہوئی کشیدگی کے پیشِ نظر جون کے لیے پیٹرولیم مصنوعات کے اسٹریٹجک ذخائر محفوظ کرلیے ہیں۔
وزارتِ پیٹرولیم کے حکام کے مطابق توانائی ضروریات کو مدنظر رکھتے ہوئے 446 میٹرک ٹن خام تیل کا ذخیرہ یقینی بنایا گیا ہے جبکہ 201 میٹرک ٹن ڈیزل کے انتظامات بھی مکمل کرلیے گئے ہیں۔
حکام کا کہنا ہے کہ مقامی سطح پر 98 میٹرک ٹن پیٹرول حاصل کرنے کا تخمینہ لگایا گیا ہے جبکہ 18 میٹرک ٹن جیٹ فیول بھی محفوظ کیا گیا ہے تاکہ کسی بھی ہنگامی صورتحال میں ایندھن کی فراہمی متاثر نہ ہو۔
ذرائع کے مطابق 12 دنوں کے لیے JP-8 فیول کے ذخائر بھی تیار رکھے گئے ہیں جبکہ جون کے لیے 18 میٹرک ٹن ایل پی جی کا بندوبست بھی مکمل کرلیا گیا ہے۔
وزارتِ پیٹرولیم کے مطابق خطے کی صورتحال کے پیشِ نظر توانائی سیکیورٹی کو یقینی بنانے کے لیے پیشگی اقدامات کیے جا رہے ہیں اور مستقبل میں طویل المدتی توانائی منصوبہ بندی پر بھی کام جاری رہے گا۔