گورنر سندھ سید محمد نہال ہاشمی نے امدادی مشن پر جانے والے سماجی کارکن سعد ایدھی کی اسرائیل میں گرفتاری پر شدید تشویش کا اظہار کیا ہے۔
گورنر سندھ محمد نہال ہاشمی کا کہنا ہے کہ انسانیت کی خدمت کرنے والوں کو اس طرح روکنا عالمی انسانی اقدار اور قوانین کی کھلی خلاف ورزی ہے۔ انہوں نے بتایا کہ سعد ایدھی اور ان کے ساتھی مظلوم فلسطینی عوام کے لیے خوراک، ادویات اور دیگر ضروری امدادی سامان لے کر جا رہے تھے۔
سید محمد نہال ہاشمی نے واضح کیا کہ فلاحی رضاکاروں کو حراست میں لینا انسان دوستی کے جذبے کو دبانے کی ایک ناکام کوشش ہے۔ انہوں نے عالمی برادری سے مطالبہ کیا ہے کہ وہ اس معاملے کا فوری نوٹس لے اور امدادی کارکنوں کی محفوظ اور جلد رہائی کو یقینی بنائے۔
انہوں نے مزید کہا کہ پوری پاکستانی قوم انسانیت کی خدمت کرنے والے ہر فرد کے ساتھ مضبوطی سے کھڑی ہے اور فلسطینی عوام کی امداد و حمایت کے لیے اٹھنے والی ہر آواز دراصل انسانیت کی آواز ہے۔