محکمہ ریلویز نے ناگزیر وجوہات کے باعث دو روز تک معطل رہنے والی بلوچستان سے اندرونِ ملک کے لیے ٹرین سروس کو باقاعدہ طور پر بحال کردیا ہے۔
ریلوے حکام کے مطابق سیکیورٹی یا دیگر ناگزیر اسباب کی بنا پر 18 اور 19 مئی کو بلوچستان سے ٹرینوں کی آمد و رفت روک دی گئی تھی۔ اس معطلی کے دوران کوئٹہ سے پشاور جانے والی جعفر ایکسپریس کو دو دن کے لیے منسوخ کیا گیا تھا، جبکہ پشاور سے کوئٹہ آنے والی جعفر ایکسپریس کو جیکب آباد اسٹیشن تک محدود کردیا گیا تھا۔
حکام نے تصدیق کی ہے کہ بدھ سے اندرونِ ملک کے لیے ٹرین سروس دوبارہ شروع ہوچکی ہے، جس کے بعد جعفر ایکسپریس آج صبح اپنے مقررہ وقت 9 بجے کوئٹہ سے پشاور کے لیے روانہ ہوگئی۔ اسی طرح پشاور سے آنے والی جعفر ایکسپریس بھی بدھ کی سہ پہر تک کوئٹہ پہنچ جائے گی، جس سے مسافروں کی سفری مشکلات کا خاتمہ ہوجائے گا۔