وزیرِاعظم شہباز شریف سے وفاقی وزیر برائے تعلیم اور کنوینر خالد مقبول صدیقی کی قیادت میں متحدہ قومی موومنٹ کے وفد نے ملاقات کی۔
وفد میں ڈاکٹر فاروق ستار، ارکانِ قومی اسمبلی سید امین الحق اور جاوید حنیف شامل تھے، جبکہ ملاقات میں نائب وزیرِ اعظم و وزیرِ خارجہ اسحاق ڈار اور وزیراعظم کے مشیر رانا ثناء اللہ بھی شریک ہوئے۔
ملاقات کے دوران وفد نے آئندہ وفاقی بجٹ کے حوالے سے ایم کیو ایم کی تجاویز وزیرِ اعظم کو پیش کیں۔ اس موقع پر وفاقی حکومت کے تحت سندھ اور کراچی میں جاری عوامی فلاحی منصوبوں پر بھی تفصیلی تبادلہ خیال کیا گیا۔
وزیراعظم شہباز شریف نے کہا کہ ایم کیو ایم وفاقی حکومت کی ایک اہم اتحادی جماعت ہے، جس نے حکومت کے عوامی فلاح و بہبود سے متعلق ہر اقدام میں بھرپور تعاون کیا۔
وزیراعظم نے متعلقہ حکام کو ہدایت کی کہ ایم کیو ایم کی جانب سے پیش کردہ بجٹ تجاویز کا تفصیلی جائزہ لیا جائے اور قابلِ عمل و جامع لائحہ عمل تیار کرکے پیش کیا جائے۔
ملاقات میں ملک کی مجموعی سیاسی صورتحال پر بھی گفتگو کی گئی۔