آئی ایم ایف کے مشن کا پاکستان میں قیام مزید دو روز کے لیے بڑھا دیا گیا ہے، جبکہ آئندہ وفاقی بجٹ کے حوالے سے پاکستانی حکام اور آئی ایم ایف کے درمیان مذاکرات جاری ہیں۔
ذرائع کے مطابق نئے مالی سال کے بجٹ پر دونوں جانب سے مشاورت کا سلسلہ بدستور جاری ہے، تاہم اہم مالی اہداف پر تاحال مکمل اتفاق رائے نہیں ہو سکا۔
ذرائع کا کہنا ہے کہ مذاکرات میں ریونیو اقدامات، اخراجات کے منصوبوں اور معیشت کے استحکام کے لیے وسیع مالیاتی اصلاحات پر تفصیلی غور کیا جا رہا ہے۔
ذرائع کے مطابق آئی ایم ایف مشن کے دورے میں توسیع کا مقصد مزید بات چیت کے ذریعے آئندہ مالی سال کے بجٹ تجاویز اور معاشی اہداف کو حتمی شکل دینا ہے۔
ذرائع نے بتایا کہ پاکستان اور آئی ایم ایف کے درمیان جاری مذاکرات کو ملکی معاشی اصلاحاتی پروگرام اور مستقبل میں مالی معاونت کے تسلسل کے لیے انتہائی اہم قرار دیا جا رہا ہے۔