ڈائریکٹر جنرل امیگریشن اینڈ پاسپورٹس محمد علی رندھاوا کی زیر صدارت پاسپورٹ ہیڈکوارٹر اسلام آباد میں اجلاس منعقد ہوا جس میں پاسپورٹ فیس کی وصولی کے مکمل کیش لیس نظام کے نفاذ پر اب تک ہونے والی پیش رفت کا جائزہ لیا گیا۔
اجلاس میں نیشنل بینک آف پاکستان، کاز کیش، ایزی پیسہ، نادرا اور دیگر متعلقہ اداروں کے نمائندگان نے شرکت کی۔
اجلاس میں وزیراعظم پاکستان اور وفاقی وزیر داخلہ کے وژن کے مطابق پاسپورٹ فیس کی ادائیگی کو مکمل طور پر ڈیجیٹل اور کیش لیس بنانے کے اقدامات پر غور کیا گیا۔ شرکاء کو اب تک کی پیش رفت سے آگاہ کیا گیا جبکہ نظام کے مؤثر نفاذ کے لیے آئندہ کے لائحہ عمل پر بھی تبادلہ خیال کیا گیا۔
ڈائریکٹر جنرل محمد علی رندھاوا نے ہدایت کی کہ شہریوں کو پاسپورٹ فیس کی ادائیگی کے لیے جدید، آسان اور شفاف سہولیات فراہم کی جائیں تاکہ بینکوں میں طویل قطاروں سے بچا جاسکے اور پاسپورٹ کے حصول کا عمل مزید سہل بنایا جاسکے۔
اجلاس میں تمام اسٹیک ہولڈرز نے کیش لیس نظام کے جلد اور مؤثر نفاذ کے لیے مکمل تعاون کی یقین دہانی کرائی۔