پاکستان نے شپ ری سائیکلنگ کے عالمی معیار کے ہانگ کانگ کنونشن پر عملدرآمد شروع کر دیا ہے جس کے بعد ملک باضابطہ طور پر اس معاہدے کو نافذ کرنے والا 23 واں ملک بن گیا ہے۔
یہ اعلان وفاقی وزیر جنید انوار چوہدری نے کیا۔ ان کے مطابق ہانگ کانگ کنونشن کے نفاذ کے لیے قانون سازی مکمل کر لی گئی ہے جبکہ سینیٹ نے جہازوں میں خطرناک مواد کی فہرست کا بل 2026 بھی منظور کر لیا ہے۔
وزیر بحری امور نے کہا کہ شپ ری سائیکلنگ سیکٹر میں خطرناک مواد کی نگرانی کا مربوط نظام متعارف کرایا جا رہا ہے جبکہ ماحولیاتی آلودگی کم کرنے کے لیے جدید ٹریسنگ سسٹم اور جہازوں کی لازمی انسپکشن و سرٹیفکیشن کا نظام بھی شامل ہوگا۔
انہوں نے کہا کہ یہ اقدام ماحول دوست شپ بریکنگ کے فروغ، مزدوروں کی حفاظت اور گڈانی شپ بریکنگ انڈسٹری کو عالمی معیار سے ہم آہنگ کرنے کے لیے اہم سنگ میل ہے، جس سے عالمی سطح پر پاکستان کی ساکھ مزید مضبوط ہوگی۔وزارت بحری امور کو اس نظام کی عملدرآمد اور رپورٹنگ کے لیے قومی فوکل باڈی مقرر کیا گیا ہے۔