عیدالاضحیٰ کے موقع پر قربانی کی آلائشوں کو محفوظ طریقے سے دفنانے کے لیے سالڈ ویسٹ مینجمنٹ بورڈ نے تیاریاں تیز کردی ہیں۔
ترجمان سالڈ ویسٹ مینجمنٹ کے مطابق جی ٹی ایس شرافی، جام چاکرو اور گوند پاس لینڈ فل سائیٹس پر صفائی اور دفنانے کے انتظامات آخری مراحل میں داخل ہوچکے ہیں، جہاں آلائشوں کے لیے مجموعی طور پر 8 بڑی خندقیں کھودی جا رہی ہیں۔ عید کے دنوں میں صفائی ستھرائی کو برقرار رکھنے کے لیے اضافی عملہ، گاڑیاں اور سوزوکیاں متحرک رکھنے کی ہدایت کی گئی ہے اور عملہ گھر گھر سے آلائشیں اٹھانے کے لیے گلی محلوں میں موجود رہے گا۔
ترجمان نے مزید بتایا کہ تمام کلیکشن پوائنٹس پر چونے اور جراثیم کش ادویہ کا چھڑکاؤ لازمی کیا جائے گا، جبکہ شہریوں کو بائیوڈی گریڈایبل بیگز کلیکشن پوائنٹس سے بھی فراہم کیے جائیں گے۔
شہریوں سے اپیل کی گئی ہے کہ وہ آلائشوں کو تھیلیوں میں بند کر کے ہی عملے کے حوالے کریں۔ اس کے علاوہ، عوامی شکایات کے فوری ازالے کے لیے تمام اضلاع میں شکایتی مراکز قائم کردیے گئے ہیں اور ہیلپ لائن 1128 کو 24 گھنٹے فعال رکھا جائے گا جبکہ شہری اپنی شکایات کے لیے "سندھ سالڈ ویسٹ منیجمنٹ ایپ" کا استعمال بھی کرسکتے ہیں۔