وزیراعلیٰ پنجاب مریم نواز شریف نے سوشل میڈیا پلیٹ فارم ایکس پر جاری بیان میں کہا ہے کہ ن لیگ کے ایک رکن صوبائی اسمبلی اور ایک میڈیا شخصیت کے درمیان پیش آنے والا معاملہ ذاتی نوعیت کا ہے، جسے قانون اور میرٹ کے مطابق نمٹایا جائے گا۔
انہوں نے واضح کیا کہ کسی بھی خاتون کو ہراساں کرنے، دھمکیاں دینے یا اس کا استحصال کرنے کی کوشش میں ملوث افراد کو ہرگز رعایت نہیں دی جائے گی، اور قانون کی نظر میں سب برابر ہیں، چاہے ان کا تعلق کسی بھی عہدے، حیثیت یا سیاسی جماعت سے ہو۔
مریم نواز شریف نے کہا کہ ریاستی ادارے اپنی ذمہ داریاں آزادانہ، غیر جانبدارانہ اور آئین و قانون کے مطابق انجام دیں گے۔ ان کا کہنا تھا کہ خواتین کے استحصال کی کسی بھی کوشش کا سختی سے نوٹس لیا جائے گا اور اس کی مکمل روک تھام کی جائے گی۔
انہوں نے خبردار کیا کہ سیاسی دباؤ، اثر و رسوخ کے غلط استعمال یا ذاتی نوعیت کے معاملات کو عوامی سطح پر لیک کرنے کی دھمکیوں کے ذریعے کسی خاتون کو ہراساں کرنے کی اجازت نہیں دی جائے گی۔ ان کے مطابق اس معاملے میں ملوث ہر شخص کے لیے یہ ایک واضح اور سنجیدہ وارننگ ہے۔