حکومتِ سندھ نے عیدالاضحیٰ کی مناسبت سے دی جانے والی سرکاری تعطیلات کا ایک نیا نوٹیفکیشن جاری کردیا ہے، جس کے تحت چھٹیوں کے دورانیے میں کمی کردی گئی ہے۔
سندھ حکومت کی جانب سے جاری کردہ نئے نوٹیفکیشن کے مطابق، صوبے بھر میں عیدالاضحیٰ کے موقع پر 26 مئی سے 28 مئی تک سرکاری چھٹیاں ہوں گی۔ حکومتی اعلامیے میں واضح کیا گیا ہے کہ یہ تعطیلات اسلامی کیلنڈر کے مطابق 9 سے 11 ذی الحج 1447 ہجری کے دوران عام تعطیلات کے طور پر نافذ العمل رہیں گی۔
نوٹیفکیشن کے مطابق، عید پر دی جانے والی تعطیلات کو پہلے سے طے شدہ 4 دنوں سے کم کر کے اب 3 دن کردیا گیا ہے۔ یاد رہے کہ اس سے قبل حکومتِ سندھ کی جانب سے عیدالاضحیٰ کے تہوار پر 4 روز کی سرکاری چھٹیوں کا اعلان کیا گیا تھا، جس میں اب ترمیم کردی گئی ہے۔