اسرائیلی خفیہ ادارے موساد میں اعلیٰ سطح پر اہم تبدیلی سامنے آئی ہے، جہاں ایران سے متعلق مبینہ خفیہ کارروائیوں اور اسٹریٹجک اہداف کے حصول میں ناکامی کے بعد ڈپٹی ڈائریکٹر کو عہدے سے ہٹادیا گیا ہے۔
امریکی میڈیا رپورٹس کے مطابق اسرائیل نے ایران میں مبینہ طور پر سیاسی دباؤ بڑھانے اور حکومتی ڈھانچے کو کمزور کرنے کے لیے مختلف خفیہ اقدامات کیے، جن پر بھاری مالی وسائل خرچ کیے گئے اور سینکڑوں ایجنٹس کو مختلف ذمہ داریاں سونپی گئیں۔
رپورٹس میں دعویٰ کیا گیا ہے کہ ان وسیع کوششوں کے باوجود مطلوبہ نتائج حاصل نہ ہوسکے، جس کے باعث ان آپریشنز کو غیر مؤثر اور توقعات سے کم قرار دیا گیا۔ ذرائع کے مطابق اس صورتحال کو اسرائیلی خفیہ ادارے کی قیادت نے سنجیدگی سے لیا ہے۔
موساد کے ڈائریکٹر گفمین کی جانب سے جاری بیان میں اگرچہ سبکدوش ہونے والے ڈپٹی ڈائریکٹر کی 22 سالہ خدمات کو خراجِ تحسین پیش کیا گیا، تاہم مبصرین اس تبدیلی کو ادارے کی حالیہ کارکردگی سے جوڑ رہے ہیں۔
میڈیا رپورٹس کے مطابق آنے والے دنوں میں موساد کے مزید سینئر افسران کے عہدوں میں تبدیلی یا استعفوں کا بھی امکان ظاہر کیا جا رہا ہے، تاہم اس حوالے سے باضابطہ تصدیق سامنے نہیں آئی۔