امریکی صدر ڈونلڈ ٹرمپ نے کہا ہے کہ ایران کے ساتھ ممکنہ معاہدے کے حوالے سے حتمی فیصلہ واشنگٹن کرے گا اور اسرائیلی وزیرِاعظم کو امریکی پالیسی کے مطابق چلنا ہوگا۔
برطانوی اخبار فنانشل ٹائمز کو دیے گئے انٹرویو میں ڈونلڈ ٹرمپ نے کہا کہ ایران اور اسرائیل کے درمیان حالیہ کشیدگی کے باوجود تہران کے ساتھ مذاکرات کا عمل متاثر نہیں ہوگا۔
ٹرمپ کے مطابق ایران کی جانب سے اسرائیل پر میزائل حملوں نے ان کے مؤقف میں کوئی تبدیلی نہیں کی اور وہ اب بھی ایران کے ساتھ ممکنہ معاہدے کے خواہاں ہیں۔
امریکی میڈیا رپورٹس کے مطابق ٹرمپ نے اسرائیلی وزیرِاعظم نیتن یاہو کو ایران کے خلاف فوری جوابی کارروائی سے گریز کرنے اور سفارتی کوششوں کو موقع دینے کا مشورہ دیا ہے۔
رپورٹس میں کہا گیا ہے کہ واشنگٹن کو ایران کے ساتھ مذاکرات میں پیش رفت کی امید ہے تاہم ٹرمپ نے واضح کیا کہ اگر معاہدہ نہ ہوا تو امریکا مزید سخت اقدامات پر غور کر سکتا ہے جن میں فوجی کارروائی یا اقتصادی دباؤ شامل ہیں۔