سپریم کورٹ کراچی رجسٹری نے سانحہ بلدیہ ٹاؤن فیکٹری کیس کے مرکزی ملزمان رحمان بھولا اور زبیر چریا کی سزائے موت کے خلاف دائر اپیلوں پر بڑا فیصلہ سناتے ہوئے انہیں کالعدم قرار دے دیا ہے اور دونوں ملزمان کو مقدمے سے بری کرنے کا حکم جاری کیا ہے۔
عدالتی کارروائی کے دوران ایم کیو ایم کے وکلاء بیرسٹر فروغ نسیم اور حسان صابر ایڈووکیٹ عدالت میں پیش ہوئے۔ سماعت کے دوران وکیلِ صفائی حسان صابر نے موقف اختیار کیا کہ استغاثہ کے پاس ایسا کوئی ٹھوس ثبوت یا چشم دید گواہ موجود نہیں ہے جس نے ملزمان کو فیکٹری میں آگ لگاتے ہوئے دیکھا ہو۔
عدالت عظمیٰ نے وکلاء کے دلائل مکمل ہونے اور موجود شواہد کا باریک بینی سے جائزہ لینے کے بعد دونوں ملزمان کی سزائے موت کے خلاف اپیلیں منظور کرتے ہوئے انہیں بری کرنے کا فیصلہ سنایا۔
واضح رہے کہ اس سے قبل ماتحت عدالت نے جرم ثابت ہونے پر دونوں ملزمان کو سزائے موت سنائی تھی، جسے انہوں نے سپریم کورٹ میں چیلنج کر رکھا تھا۔