وفاقی حکومت نئے مالی سال کے بجٹ میں چھوٹے تاجروں کے لیے فکسڈ ٹیکس اسکیم متعارف کرانے کی تیاری کر رہی ہے جس کے تحت ملک بھر کے 35 لاکھ سے زائد چھوٹے تاجروں کو ٹیکس نیٹ میں لانے کا منصوبہ بنایا گیا ہے۔
ذرائع کے مطابق مجوزہ اسکیم کے تحت سالانہ 20 کروڑ روپے یا اس سے کم کاروباری حجم رکھنے والے تاجروں پر ایک فیصد فکسڈ ٹیکس لاگو ہوگا۔ اسکیم میں شمولیت کے لیے تاجروں کو 25 ہزار روپے رجسٹریشن فیس ایک صفحے پر مشتمل آسان ٹیکس گوشوارے کے ساتھ جمع کرانا ہوگی۔
حکومتی تخمینوں کے مطابق اس اقدام سے قومی خزانے کو سالانہ تقریباً 50 ارب روپے کی اضافی آمدن حاصل ہونے کی توقع ہے۔ مجوزہ نظام کے تحت 20 کروڑ روپے تک سالانہ ٹرن اوور رکھنے والے تاجر 25 ہزار روپے ٹیکس ادا کریں گے جبکہ رجسٹرڈ فائلر تاجروں کی دکانوں پر ان کے نام اور این ٹی این نمبر پر مشتمل سلیٹ آویزاں کرنا بھی لازمی ہوگا۔
اس کے علاوہ تاجروں کو رضاکارانہ فکسڈ ٹیکس اسکیم یا نارمل ٹیکس رجیم میں سے کسی ایک کا انتخاب کرنا ہوگا جبکہ رجسٹریشن نہ کرانے والے تاجروں کے خلاف بھاری جرمانوں کی تجویز بھی زیر غور ہے۔