ایران کی پاسدارانِ انقلاب فورس نے امریکی صدر ڈونلڈ ٹرمپ کے اس دعوے کو مسترد کر دیا ہے کہ ایران اور امریکہ کے درمیان آج (اتوار) امن معاہدے پر دستخط کیے جائیں گے۔
پاسدارانِ انقلاب کے جاری کردہ بیان میں کہا گیا ہے کہ ایرانی مذاکرات کار پہلے ہی واضح کرچکے ہیں کہ اتوار کے روز کسی بھی معاہدے پر دستخط نہیں ہوں گے۔ بیان کے مطابق صدر ٹرمپ اپنی سالگرہ کے موقع پر 14 جون کو معاہدے کی دستخطی تقریب منعقد کرنا چاہتے ہیں تاکہ اسے علامتی اہمیت دے کر ذاتی تشہیر کے لیے استعمال کیا جاسکے۔
دوسری جانب امریکی صدر ڈونلڈ ٹرمپ نے اپنے بیان میں کہا تھا کہ ایران کے ساتھ معاہدے پر آج دستخط ہوں گے اور معاہدہ طے پاتے ہی آبنائے ہرمز کو کھول دیا جائے گا۔ ان کا کہنا تھا کہ اس معاہدے کے بعد ایران کے ساتھ امریکہ کے تعلقات پہلے سے بہتر ہوں گے اور اس میں کسی قسم کی مالی ادائیگی یا رقم کا تبادلہ شامل نہیں ہوگا۔
ادھر وزیراعظم شہباز شریف نے بھی سوشل میڈیا پلیٹ فارم ایکس پر اپنے پیغام میں امید ظاہر کی تھی کہ آئندہ 24 گھنٹوں میں امریکا اور ایران کے درمیان امن معاہدے کو حتمی شکل دے دی جائے گی، جبکہ انہوں نے مذاکراتی عمل میں تعاون پر دونوں ممالک کا شکریہ بھی ادا کیا۔