وفاقی وزیرِ صحت مصطفیٰ کمال نے کہا ہے کہ پاکستان میں آبادی میں تیزی سے اضافہ ملک کا سب سے بڑا مسئلہ بنتا جا رہا ہے اور اگر یہی رجحان برقرار رہا تو 2030ء تک پاکستان آبادی کے لحاظ سے دنیا میں چوتھے نمبر پر آ سکتا ہے۔
قومی اسمبلی میں اظہار خیال کرتے ہوئے انہوں نے کہا کہ ہر سال اتنی آبادی پیدا ہو رہی ہے جتنی نیوزی لینڈ کی کل آبادی ہے جبکہ موجودہ صورتحال برقرار رہی تو 2050ء تک ملک کی آبادی 40 کروڑ تک پہنچ سکتی ہے۔
انہوں نے بتایا کہ ملک میں ہر سال 11 ہزار مائیں زچگی کے دوران جان کی بازی ہار جاتی ہیں جبکہ 2 کروڑ 62 لاکھ بچے اسکولوں سے باہر ہیں، جو ایک سنگین تعلیمی بحران کی نشاندہی کرتا ہے۔
مصطفیٰ کمال کے مطابق صورتحال سے نمٹنے کے لیے ہر سال 66 ہزار پرائمری اسکولز، 3600 پرائمری ہیلتھ یونٹس اور 6 کروڑ 50 لاکھ نوجوانوں کے لیے روزگار کے مواقع درکار ہوں گے، جبکہ 2 کروڑ نئے گھروں کی بھی ضرورت ہے۔
انہوں نے کہا کہ بلوچستان کو پنجاب کے برابر وسائل حاصل کرنے کے لیے اپنی آبادی بھی اسی سطح پر لانا ہوگی، کیونکہ یہ این ایف سی ایوارڈ کے تحت وسائل کی تقسیم کا بنیادی اصول ہے۔
وفاقی وزیر نے مزید کہا کہ کے فور منصوبہ مکمل ہونے کے باوجود کراچی میں پانی کا بحران ختم نہیں ہوگا اور ٹینکر مافیا کا نظام بدستور چلتا رہے گا۔