چین کی وزارت خارجہ نے کہا ہے کہ آبنائے ہرمز کی جلد بحالی اور اس میں آزادانہ بحری آمدورفت تمام فریقین کے مفاد میں ہے۔
بیجنگ میں نیوز کانفرنس کے دوران چینی وزارت خارجہ کے ترجمان لین جیان نے کہا کہ آبنائے ہرمز ایک انتہائی اہم بین الاقوامی بحری گزرگاہ ہے، اور اس کی بندش یا رکاوٹ عالمی توانائی اور تجارت پر منفی اثرات مرتب کر سکتی ہے۔
ترجمان کے مطابق ایران اور امریکا کے درمیان حالیہ معاہدے میں آبنائے ہرمز کو کھلا رکھنے سے متعلق نکات بھی شامل ہیں، جو خطے میں کشیدگی میں کمی اور تجارتی سرگرمیوں کی بحالی کے لیے اہم پیش رفت ہے۔
لین جیان نے مزید کہا کہ چین اس معاملے پر بین الاقوامی برادری کے ساتھ رابطے اور مشاورت جاری رکھے گا۔ انہوں نے اس عزم کا اظہار کیا کہ چین اپنے تجارتی بحری جہازوں کے تحفظ کے لیے تمام ضروری اقدامات کرتا رہے گا تاکہ سمندری راستوں کی سلامتی کو یقینی بنایا جاسکے۔