پیٹرولیم مصنوعات کی قیمتوں میں نمایاں کمی سے متعلق اہم دعوے سامنے آئے ہیں، جن میں کہا جا رہا ہے کہ پیٹرول کی قیمت میں یکمشت 108 روپے فی لیٹر تک کمی پر غور کیا جا رہا ہے۔
حکومتی ذرائع کے حوالے سے سامنے آنے والی اطلاعات کے مطابق عالمی منڈی میں خام تیل کی قیمتوں میں کمی اور خطے میں حالیہ پیش رفت کے بعد حکومت نے ممکنہ ریلیف عوام تک منتقل کرنے پر غور شروع کر دیا ہے۔
ذرائع کا کہنا ہے کہ یہ ممکنہ کمی وزیر اعظم شہباز شریف کی جانب سے اعلان کیے جانے کا امکان ہے، جبکہ اعلان آئندہ چند روز میں، ممکنہ طور پر جمعہ سے قبل کیے جانے کی توقع ظاہر کی جا رہی ہے۔
تاہم حکومتی سطح پر تاحال اس حوالے سے کوئی باضابطہ اعلان سامنے نہیں آیا، اور نہ ہی مجوزہ کمی کی حتمی شرح کی سرکاری طور پر تصدیق کی گئی ہے۔
عوامی حلقوں میں ان خبروں کے بعد پیٹرولیم مصنوعات کی قیمتوں میں ممکنہ بڑی کمی سے متعلق توقعات میں اضافہ دیکھا جا رہا ہے، تاہم حتمی فیصلہ اور اعلان حکومت کی جانب سے ہی کیا جائے گا۔