ملک بھر کے بجلی صارفین کے لیے ایک بار پھر بجلی مہنگی ہونے کا امکان پیدا ہوگیا ہے کیونکہ فی یونٹ بجلی 82 پیسے مہنگی کرنے کی درخواست قومی الیکٹرک پاور ریگولیٹری اتھارٹی (نیپرا) میں جمع کرا دی گئی ہے۔
نیپرا کے مطابق یہ درخواست مئی 2026 کی فیول پرائس ایڈجسٹمنٹ کی مد میں سینٹرل پاور پرچیزنگ ایجنسی (سی پی پی اے) کی جانب سے دائر کی گئی ہے۔ درخواست پر 30 جون کو سماعت ہوگی جس کے بعد ریگولیٹری اتھارٹی حتمی فیصلہ جاری کرے گی۔
ذرائع کا کہنا ہے کہ اگر نیپرا نے درخواست منظور کر لی تو بجلی صارفین پر تقریباً 12 ارب روپے کا اضافی مالی بوجھ پڑے گا جس سے گھریلو اور صنعتی صارفین متاثر ہو سکتے ہیں۔
سی پی پی اے کے مطابق مئی 2026 کے دوران بجلی کی اوسط فیول لاگت 9 روپے 25 پیسے فی یونٹ ریکارڈ کی گئی جس کی بنیاد پر نرخوں میں اضافے کی درخواست کی گئی ہے۔
نیپرا سماعت کے دوران تمام متعلقہ اعداد و شمار، تکنیکی پہلوؤں اور فریقین کے مؤقف کا جائزہ لینے کے بعد بجلی کی قیمت میں اضافے یا رد و بدل سے متعلق اپنا فیصلہ سنائے گا۔