میئر کراچی بیرسٹر مرتضیٰ وہاب نے بلدیہ عظمیٰ کراچی کے ملازمین کے لیے ایک بڑے اور تاریخی اقدام کا آغاز کرتے ہوئے 11 ہزار سے زائد ملازمین کو ہیلتھ انشورنس کارڈ کی فراہمی شروع کردی ہے۔ اس اقدام کے بعد بلدیہ عظمیٰ کراچی اپنے ملازمین کو ہیلتھ انشورنس فراہم کرنے والی پاکستان کی پہلی کونسل بن گئی ہے۔
اس اسکیم کے تحت بلدیہ عظمیٰ کراچی کے ملازمین ملک بھر کے 200 سے زائد نجی اور سرکاری اسپتالوں میں ڈیڑھ لاکھ روپے سے لے کر 6 لاکھ روپے تک کا مفت علاج کروا سکیں گے۔
میئر کراچی بیرسٹر مرتضیٰ وہاب نے اس موقع پر ملازمین کو مزید سہولیات فراہم کرنے کے عزم کا اعادہ کرتے ہوئے کہا کہ پاکستان پیپلز پارٹی کو بلدیہ عظمیٰ کراچی میں پہلی مرتبہ حکومت بنانے کا موقع ملا ہے، جس کے بعد ہم نے ملازمین کے دیرینہ مسائل کے حل پر خاص توجہ دی ہے۔ انہوں نے مزید کہا کہ پیپلز پارٹی نے ہمیشہ مزدور طبقے کی آواز کو اعلیٰ ایوانوں میں بلند کیا ہے اور ان کے حقوق کا تحفظ کیا ہے۔
مرتضیٰ وہاب کا کہنا تھا کہ ہیلتھ کارڈز کی فراہمی سے قبل گزشتہ دنوں بلدیہ عظمیٰ کراچی کے ملازمین کو آسان اقساط پر الیکٹرک موٹر سائیکلیں بھی فراہم کی گئی ہیں تاکہ انہیں سفری سہولیات میسر آسکیں۔