امیر جماعت اسلامی پاکستان حافظ نعیم الرحمان نے کہا ہے کہ ملک میں پیٹرول کی قیمتیں 225 روپے فی لیٹر پر فکس ہونی چاہئیں تاکہ عوام کو ریلیف فراہم کیا جاسکے اور مہنگائی کے بوجھ میں کمی لائی جاسکے۔
لاہور میں پریس کانفرنس کرتے ہوئے انہوں نے ملکی و بین الاقوامی سیاسی، معاشی اور علاقائی صورتحال پر تفصیلی اظہارِ خیال کیا۔ انہوں نے کہا کہ عالمی طاقتیں اپنے اہداف حاصل کرنے میں ناکام رہی ہیں اور خطے میں ان کی پالیسیوں کے مطلوبہ نتائج سامنے نہیں آئے۔
انہوں نے کہا کہ اسرائیل ایک ناجائز ریاست ہے اور اس کے حوالے سے جماعت اسلامی کا مؤقف واضح اور مستقل ہے۔دفاعی اور سفارتی معاملات پر گفتگو کرتے ہوئے حافظ نعیم الرحمان نے کہا کہ پاکستان اور سعودی عرب کے درمیان دفاعی تعاون کے معاہدے میں ترکیہ اور ایران کو بھی شامل کیا جانا چاہیے تاکہ خطے میں مشترکہ دفاعی ڈھانچہ مزید مضبوط بنایا جاسکے۔
انہوں نے ایران اور امریکا کے درمیان ممکنہ معاہدے کو خطے کے لیے مثبت پیش رفت قرار دیتے ہوئے کہا کہ پاکستان نے اس معاملے میں تعمیری اور مثبت کردار ادا کیا ہے۔
امیر جماعت اسلامی نے مزید کہا کہ پاکستان نے خلیجی ریاستوں کے ساتھ مل کر خطے میں امن و استحکام کے لیے سفارتی کوششیں جاری رکھی ہیں، جو علاقائی استحکام کے لیے اہم ہیں۔