امریکی وزیرِ جنگ پیٹ ہیگستھ نے برسلز میں نیٹو وزرائے دفاع کے اجلاس کے بعد گفتگو کرتے ہوئے کہا ہے کہ ایران کے ساتھ معاہدہ امریکا کی مضبوط اور طاقتور پوزیشن کی وجہ سے ممکن ہوا ہے، تاہم مشرقِ وسطیٰ میں امریکی افواج کی موجودگی کا فیصلہ زمینی حالات کو مدنظر رکھ کر ہی کیا جائے گا۔
انہوں نے واضح طور پر خبردار کیا کہ اگر ایران نے اپنے وعدے اور ذمہ داریاں پوری نہ کیں تو امریکا دوبارہ کارروائی کے لیے تیار ہے اور ایسی صورت میں ایران کی سخت اور مؤثر بحری ناکہ بندی دوبارہ نافذ کردی جائے گی۔
پیٹ ہیگستھ کا کہنا تھا کہ یورپ کے کچھ ممالک آبنائے ہرمز میں سیکیورٹی اور بحری آپریشنز میں مزید فعال کردار ادا کرنے کے لیے رضامند ہیں۔ انہوں نے اس بات پر زور دیا کہ ایران کو کسی قسم کا یک طرفہ فائدہ یا رعایت نہیں دی جارہی بلکہ ان مذاکرات کے پیچھے امریکا کی بھرپور فوجی طاقت اور دباؤ برقرار رہے گا۔