ڈسٹرکٹ اینڈ سیشن کورٹس اسلام آباد نے ریاستی اداروں کے خلاف مبینہ گمراہ کن الزامات اور ان کی ساکھ متاثر کرنے سے متعلق مقدمے میں وزیراعلیٰ خیبرپختونخوا سہیل آفریدی کے ناقابلِ ضمانت وارنٹ گرفتاری برقرار رکھتے ہوئے انہیں عدالت میں پیش کرنے کا حکم دے دیا۔
مقدمے کی سماعت سینئر سول جج عباس شاہ نے کی، جس دوران وزیراعلیٰ خیبرپختونخوا عدالت میں پیش نہ ہوئے۔ عدم حاضری پر عدالت نے پہلے سے جاری ناقابلِ ضمانت وارنٹ برقرار رکھنے کا فیصلہ سناتے ہوئے متعلقہ حکام کو انہیں گرفتار کرکے عدالت میں پیش کرنے کی ہدایت جاری کی۔
سہیل آفریدی کے خلاف مقدمہ پیکا ایکٹ کے تحت نیشنل سائبر کرائم انویسٹی گیشن ایجنسی (این سی سی آئی اے) نے درج کیا تھا۔ مقدمے میں ان پر ریاستی اداروں کے بارے میں مبینہ طور پر گمراہ کن الزامات لگانے اور ان کی ساکھ کو نقصان پہنچانے کا الزام عائد کیا گیا ہے۔
عدالت نے کیس کی مزید کارروائی کے لیے سماعت 29 جون تک ملتوی کردی۔