چیئرمین پاکستان انٹرنیشنل ایئرلائنز اسلم آر خان انتقال کرگئے۔
اسلم آر خان گزشتہ چھ دہائیوں سے قومی ایئرلائن سے وابستہ تھے اور ادارے میں انہیں ایک تجربہ کار، باوقار اور شفیق رہنما کے طور پر جانا جاتا تھا۔ ان کی قیادت میں پی آئی اے کی تنظیمِ نو اور اسے مالی طور پر مستحکم بنانے کے اقدامات میں اہم پیش رفت ہوئی، جبکہ کئی اہم فیصلوں کو ادارے کی بحالی اور منافع کی طرف واپسی میں بنیادی حیثیت حاصل رہی۔
پی آئی اے کے سابق چیئرمین اسلم آر خان کو ایک ایسا منتظم قرار دیا جاتا تھا جو بروقت اور مشکل فیصلے کرنے کی صلاحیت رکھتے تھے۔ وہ انتظامی امور کے ساتھ ساتھ فلاحی سرگرمیوں کی سرپرستی بھی کرتے رہے۔
سی ای او پی آئی اے کے مطابق اسلم آر خان کے انتقال سے ادارہ گہرے دکھ اور صدمے سے دوچار ہے۔ ان کے مطابق مرحوم کے ساتھ کام کرنا اعزاز کی بات تھی اور ان کی خدمات ہمیشہ یاد رکھی جائیں گی۔
مرحوم کی نماز جنازہ آج نماز جمعہ کے بعد ان کی رہائش گاہ خیابانِ غازی، ڈیفنس کراچی میں ادا کی جائے گی۔