اسرائیل نے مشرقِ وسطیٰ میں جاری امن عمل کے دوران لبنان پر حملوں میں مزید شدت پیدا کردی ہے۔ اسرائیلی فوج کی جانب سے جنوبی لبنان کے علاقے نبطیہ پر شدید بمباری اور گولہ باری کی گئی، جس کے نتیجے میں متعدد عمارتیں تباہ ہوگئیں۔
لبنانی حکام کے مطابق تازہ حملوں میں 16 افراد شہید ہوئے ہیں، جبکہ متعدد شہری زخمی بھی ہوئے ہیں۔ امدادی ٹیمیں متاثرہ علاقوں میں امدادی سرگرمیوں میں مصروف ہیں اور ملبے تلے دبے افراد کی تلاش جاری ہے۔
اس سے ایک روز قبل بھی اسرائیلی حملوں میں 3 شہری جان کی بازی ہار گئے تھے۔ دو مارچ سے لبنان میں جاری اسرائیلی کارروائیوں کے نتیجے میں شہید ہونے والے افراد کی مجموعی تعداد 3912 ہوگئی ہے۔
لبنانی حکام نے اسرائیلی حملوں کی مذمت کرتے ہوئے عالمی برادری سے فوری مداخلت اور شہری آبادی کے تحفظ کے لیے مؤثر اقدامات کا مطالبہ کیا ہے۔