سیشن کورٹ لاہور نے اداکارہ مومنہ اقبال کو مبینہ طور پر ہراساں کرنے اور جان سے مارنے کی دھمکیاں دینے کے مقدمے میں رکن صوبائی اسمبلی ثاقب چدھڑ اور ان کی اہلیہ کو تفتیش میں شامل ہونے کا حکم دے دیا۔
ایڈیشنل سیشن جج نصرت علی صدیقی نے ملزمان کی عبوری ضمانت کی درخواستوں پر سماعت کی۔ اس موقع پر ثاقب چدھڑ اور ان کی اہلیہ عبوری ضمانت کی مدت مکمل ہونے پر عدالت میں پیش ہوئے۔
سماعت کے دوران عدالت نے دونوں ملزمان کو نیشنل سائبر کرائم انویسٹی گیشن ایجنسی کے روبرو شاملِ تفتیش ہونے کی ہدایت کی اور آئندہ سماعت پر تفتیشی رپورٹ طلب کرلی۔
عدالت نے ثاقب چدھڑ اور ان کی اہلیہ کی عبوری ضمانت میں 13 جولائی تک توسیع کرتے ہوئے کیس کی مزید سماعت آئندہ تاریخ تک ملتوی کردی۔