انسدادِ دہشت گردی عدالت اسلام آباد نے گروپ کیپٹن شہید عاصم طارق قتل کیس کے ملزم سعد عباسی کو 14 روزہ شناخت پریڈ کے لیے جوڈیشل لاک اپ بھیج دیا، جبکہ ملزم کو آئندہ سماعت پر 20 جولائی کو دوبارہ عدالت میں پیش کرنے کا حکم دیا گیا۔
سماعت کے دوران تفتیشی افسر نے عدالت کو بتایا کہ ملزم سعد عباسی کی شناخت پریڈ کرانا ضروری ہے، جس پر عدالت نے ملزم کو 14 روز کے لیے جوڈیشل لاک اپ بھیجنے کی منظوری دے دی۔
اس موقع پر پراسیکیوٹر راجا نوید نے عدالت کو آگاہ کیا کہ مقدمے میں دو چشم دید گواہ بھی موجود ہیں، جن کی موجودگی میں شناخت پریڈ انتہائی اہم ہے۔
دورانِ سماعت جج ابو الحسنات ذوالقرنین نے ملزم سے استفسار کیا، ”کیوں کیا ہے کام؟“
اس پر ملزم سعد عباسی نے جواب دیا، ”میں ایک لڑکی کے ساتھ تھا، ایک بندہ آ کر ہمیں ڈسٹرب کر رہا تھا۔“
ملزم کے جواب پر جج ابو الحسنات ذوالقرنین نے ریمارکس دیے، ”ڈسٹرب کیا؟ کیا اچھا کام کر رہے تھے جو ڈسٹرب کیا؟“
بعد ازاں عدالت نے ملزم کو شناخت پریڈ کے لیے جوڈیشل لاک اپ بھیجتے ہوئے مزید کارروائی 20 جولائی تک ملتوی کردی۔