بلوچستان میں منگی ڈیم پولیس اسٹیشن پر حملے کے بعد شروع کیے گئے آپریشن شعبان کے دوران سکیورٹی فورسز نے مزید 13 مشتبہ دہشت گردوں کو ہلاک کرنے کا دعویٰ کیا ہے۔
سیکیورٹی ذرائع کے مطابق پاکستان آرمی، فرنٹیئر کور (ایف سی) اور بلوچستان پولیس کی مشترکہ کارروائیاں پہاڑی علاقوں میں جاری ہیں، جہاں دہشت گردوں کے ٹھکانوں کو نشانہ بنایا جا رہا ہے۔
ذرائع کا کہنا ہے کہ 6 اور 7 جولائی کو 26 مشتبہ دہشت گرد ہلاک کیے گئے تھے، جبکہ تازہ کارروائی کے بعد آپریشن شعبان میں ہلاک ہونے والوں کی مجموعی تعداد 39 ہوگئی ہے۔
سیکیورٹی ذرائع کے مطابق فورسز زمینی اور فضائی کارروائیوں کے ذریعے دہشت گردوں کے ٹھکانوں کا محاصرہ مزید سخت کررہی ہیں۔
ادھر خضدار کے علاقے زہری میں جمعہ کو پولیس اسٹیشن پر حملے کی کوشش بھی ناکام بنادی گئی۔ سیکیورٹی ذرائع کے مطابق اس کارروائی میں 8 مشتبہ دہشت گرد مارے گئے، جبکہ ہیلی کاپٹر کے ذریعے کی گئی ایک اور کارروائی میں مزید 5 سے 6 مشتبہ دہشت گردوں کی ہلاکت کی اطلاعات ہیں۔
سیکیورٹی ذرائع کے مطابق 5 جولائی سے اب تک آپریشن شعبان اور دیگر سکیورٹی کارروائیوں کے دوران مجموعی طور پر 75 مشتبہ دہشت گرد ہلاک کیے جاچکے ہیں۔
واضح رہے کہ مذکورہ اعداد و شمار اور دعوے سیکیورٹی ذرائع کی جانب سے جاری کیے گئے ہیں، جن کی آزاد ذرائع سے تصدیق نہیں ہوسکی۔