گلگت بلتستان کے ضلع دیامر میں گزشتہ رات مختلف وادیوں میں آنے والے سیلابی ریلوں نے بڑے پیمانے پر تباہی مچا دی جبکہ شاہراہِ قراقرم مختلف مقامات پر لینڈ سلائیڈنگ کے باعث بند ہو گئی۔
مقامی پولیس کے مطابق سیلابی ریلوں سے متعدد مکانات، درخت، زرعی فصلیں، رابطہ پل، پن چکیاں اور واٹر چینلز شدید متاثر ہوئے ہیں جبکہ کئی علاقوں میں بنیادی ڈھانچے کو بھی نقصان پہنچا ہے۔
رپورٹس کے مطابق چلاس میں گونر فارم نرسری کے قریب سیلابی ریلے کے بعد شاہراہِ قراقرم گزشتہ رات سے ٹریفک کے لیے بند ہے، جس کے باعث دونوں جانب گاڑیوں کی طویل قطاریں لگ گئی ہیں۔
سڑک کی بندش کے باعث پھنسے ہوئے مسافروں میں خواتین، بچے اور بزرگ بھی شامل ہیں، جنہیں شدید مشکلات کا سامنا ہے۔ مسافروں نے حکومت سے مطالبہ کیا ہے کہ شاہراہِ قراقرم کو جلد از جلد ٹریفک کے لیے بحال کیا جائے۔
متعلقہ اداروں نے متاثرہ علاقوں میں نقصانات کا تخمینہ لگانے، ملبہ ہٹانے اور سڑکوں و پلوں کی بحالی کا کام شروع کر دیا ہے، تاہم بحالی کے عمل میں وقت لگنے کا امکان ظاہر کیا جا رہا ہے۔