وفاقی آئینی عدالت نے پیرسوہاوہ میں واقع مونال ریسٹورنٹ کو گرانے کا فیصلہ کالعدم قرار دیتے ہوئے سی ڈی اے اور میٹروپولیٹن سٹی کی اپیلیں منظور کر لیں، جبکہ اس معاملے میں جاری حکمِ امتناع بھی ختم کر دیا۔
عدالت نے اپنے فیصلے میں قرار دیا کہ جائیداد کی ملکیت سے متعلق معاملات کا فیصلہ ٹرائل کورٹس عدالتی آبزرویشنز سے متاثر ہوئے بغیر کریں گی، جبکہ انتظامی امور سے متعلق فیصلے متعلقہ ریگولیٹری ادارے کریں گے۔
وفاقی آئینی عدالت نے ٹرائل کورٹس کو ہدایت کی کہ وہ اس معاملے سے متعلق زیر التوا مقدمات کا جلد از جلد فیصلہ کریں۔
سماعت کے دوران جسٹس حسن اظہر رضوی نے ریمارکس دیے کہ سپریم کورٹ کے سابق فیصلے میں کئی نکات کو مدنظر نہیں رکھا گیا۔ انہوں نے کہا کہ عدالت جذبات کی بنیاد پر نہیں بلکہ قانون کے مطابق فیصلہ کرے گی۔
بعد ازاں وفاقی آئینی عدالت نے پیرسوہاوہ مونال ریسٹورنٹ گرانے کا فیصلہ کالعدم قرار دیتے ہوئے کیس سے متعلق مزید کارروائی کے لیے متعلقہ فورمز کو ہدایات جاری کر دیں۔