وفاقی وزیر برائے بحری امور جنید انوار چوہدری نے کہا ہے کہ پاکستان میرین اکیڈمی کی اپ گریڈیشن سے متعلق سمری وزیراعظم کو ارسال کر دی گئی ہے جبکہ تمام قانونی، انتظامی اور مشاورتی مراحل مکمل ہو چکے ہیں۔
انہوں نے بتایا کہ وزیراعظم کی منظوری کے بعد سمری وزارتِ قانون کو بھجوائی جائے گی، جس کے بعد وفاقی کابینہ پاکستان میرین اکیڈمی کی اپ گریڈیشن کی حتمی منظوری دے گی۔
وفاقی وزیر کے مطابق حکومت پاکستان میرین اکیڈمی کو ڈگری دینے والا ادارہ بنانا چاہتی ہے تاکہ میری ٹائم تعلیم کو عالمی معیار سے ہم آہنگ کیا جا سکے۔ انہوں نے کہا کہ شپنگ انڈسٹری کی ضروریات پوری کرنے اور عالمی معیار کی بحری افرادی قوت پیدا کرنے کے لیے اقدامات جاری ہیں۔
جنید انوار چوہدری نے مزید بتایا کہ دنیا کے ممتاز بحری تعلیمی اداروں کے ساتھ ڈوئل ڈگری پروگرام شروع کرنے کے لیے بھی بات چیت جاری ہے جس سے پاکستانی طلبہ کو بین الاقوامی معیار کی تعلیم اور روزگار کے بہتر مواقع میسر آئیں گے۔