مولانا فضل الرحمان کے خلاف متنازع تقریر پر مقدمہ درج کرنے کی درخواست پر عدالت نے ڈائریکٹر نیشنل سائبر کرائم انویسٹی گیشن ایجنسی (این سی سی آئی اے) سے جواب طلب کرتے ہوئے سماعت 17 اگست تک ملتوی کر دی۔
ایڈیشنل سیشن جج ملک لطیف نے درخواست کی سماعت کی جس دوران درخواست گزار محمد وقار کے وکلاء مدثر چوہدری اور علی شان مناواں نے عدالت کے روبرو اپنے دلائل پیش کیے۔
درخواست گزار کے وکیل نے مؤقف اختیار کیا کہ انہوں نے سوشل میڈیا پر مولانا فضل الرحمان کی ایک تقریر دیکھی جس میں شہداء کے بارے میں متنازع گفتگو کی گئی جس سے ان سمیت عوام کے جذبات مجروح ہوئے۔
درخواست میں کہا گیا ہے کہ مولانا فضل الرحمان کے بیان سے شہداء کے ورثاء کی دل آزاری ہوئی، لہٰذا عدالت متعلقہ اداروں کو ان کے خلاف مقدمہ درج کرنے کا حکم دے۔
عدالت نے فریقین کے ابتدائی مؤقف سننے کے بعد ڈائریکٹر این سی سی آئی اے سے جواب طلب کرتے ہوئے کیس کی مزید سماعت 17 اگست تک ملتوی کر دی۔