بھارتی اداکارہ اور بگ باس 13 سے شہرت حاصل کرنے والی شہناز گل نے بالی ووڈ سپر اسٹار سلمان خان کے ساتھ اپنے تعلقات پر کھل کر اظہارِ خیال کرتے ہوئے کہا ہے کہ سلمان خان ہمیشہ سچ کا ساتھ دیتے ہیں ۔
بھارتی میڈیا کو دیے گئے انٹرویو میں شہناز گل نے کہا کہ بگ باس کے دوران انہیں لگتا تھا کہ شاید وہ سلمان خان کی پسندیدہ کنٹسٹنٹ ہیں لیکن بعد میں احساس ہوا کہ وہ صرف حق اور سچ کی حمایت کرتے تھے۔ انہوں نے بتایا کہ سلمان خان نے جہاں ضرورت پڑی ان کی تعریف کی، وہیں غلطی پر ڈانٹنے سے بھی گریز نہیں کیا۔
شہناز گل نے سلمان خان کی شخصیت کو سراہتے ہوئے کہا کہ وہ اپنے اردگرد موجود ہر شخص کا یکساں خیال رکھتے ہیں بہترین میزبان ہیں اور ہر آنے والے کو برابر کی اہمیت دیتے ہیں۔
واضح رہے کہ بگ باس 13 کے دوران سلمان خان اور شہناز گل کی خوشگوار گفتگو اور دوستانہ تعلقات نے مداحوں میں خاصی مقبولیت حاصل کی تھی، جس کے بعد دونوں اکثر خبروں کی زینت بنتے رہے ہیں۔