دبئی پولیس نے انتہائی مستعدی کا مظاہرہ کرتے ہوئے ڈیرہ کے ایک منی ایکسچینج میں ہونے والی مسلح ڈکیتی کی کوشش کو محض 10 منٹ کے اندر ناکام بنا کر دو ملزمان کو گرفتار کرلیا۔
پولیس حکام کے مطابق نقاب پوش مسلح ڈاکو منی ایکسچینج کے عملے کو تشدد کا نشانہ بنانے اور انہیں رسیوں سے باندھنے کے بعد ایک کروڑ درہم لوٹ کر فرار ہو رہے تھے کہ اسی دوران ایک ملازم نے کسی طرح اپنے موبائل فون کے ذریعے پولیس کو واقعے کی اطلاع دی۔
اطلاع ملتے ہی دبئی پولیس فوری طور پر حرکت میں آئی اور پورے ڈیرہ دبئی کی ناکہ بندی کرنے کے ساتھ ساتھ فضائی نگرانی کا آغاز کردیا گیا۔
اس دوران پولیس ہیلی کاپٹر نے فرار ہونے کی کوشش کرنے والے دونوں ڈاکوؤں کا کامیابی سے سراغ لگا کر انہیں دھر دبوچا۔ پولیس کا کہنا ہے کہ گرفتار ملزمان کا تعلق ایک افریقی ملک سے ہے اور ان کے قبضے سے لوٹی گئی تمام رقم بھی بحفاظت برآمد کرلی گئی ہے۔