سعودی عرب کے دارالحکومت ریاض کے علاقے منفوحہ میں گیس سلنڈر دھماکے کے نتیجے میں پانچ پاکستانی شہری جاں بحق ہوگئے۔ ابتدائی اطلاعات کے مطابق تمام متاثرین کا تعلق خیبر پختونخوا کے ضلع مانسہرہ سے تھا۔
جاں بحق ہونے والوں میں محمد سعید، عابد حسین، عبدالرحمان، محمد سفیر اور محمد رستم شامل ہیں۔ واقعے کے بعد سعودی حکام نے امدادی سرگرمیاں مکمل کرتے ہوئے قانونی کارروائی شروع کر دی ہے۔
ریاض میں پاکستانی سفارت خانے نے افسوسناک واقعے پر گہرے رنج و غم کا اظہار کرتے ہوئے بتایا کہ سفارتی حکام سعودی پولیس اور دیگر متعلقہ اداروں کے ساتھ مسلسل رابطے میں ہیں تاکہ تمام ضروری قانونی مراحل بروقت مکمل کیے جا سکیں۔
سفارت خانے کے مطابق قانونی تقاضے پورے ہونے کے بعد مرحومین کی میتوں کی تدفین سعودی عرب میں کرنے یا انہیں پاکستان بھجوانے سے متعلق لواحقین کی خواہش اور ضابطوں کے مطابق اقدامات کیے جائیں گے۔