بھارتی شہر غازی آباد میں جائیداد کے تنازع پر 32 سالہ نوجوان نے مبینہ طور پر اپنے والد کو گولیاں مار کر قتل کردیا۔
بھارتی میڈیا کے مطابق 52 سالہ مقتول ہری اوم چوہدری علاقے کے ایک خوش حال کسان تھے جن کے اثاثوں کی مالیت تقریباً 150 کروڑ روپے بتائی جاتی ہے۔ پولیس کا کہنا ہے کہ مقتول نے اپنے بڑے بیٹے نکہل کو پہلے ہی مارکیٹ میں دکانیں اور زمین دے رکھی تھی، تاہم وہ باقی جائیداد بھی اپنے نام منتقل کروانے کا مطالبہ کر رہا تھا جس پر دونوں کے درمیان اکثر تنازع رہتا تھا۔
گزشتہ رات ملزم نکہل مبینہ طور پر نشے کی حالت میں گھر پہنچا اور والد کی جانب سے ڈانٹ ڈپٹ کے بعد جھگڑا بڑھنے پر پستول نکال کر اندھا دھند فائرنگ کردی، جس کے نتیجے میں ہری اوم موقع پر ہی دم توڑ گئے۔
پولیس کے مطابق مقتول کے جسم پر 4 سے 6 گولیوں کے نشانات پائے گئے ہیں جبکہ ملزم واردات کے بعد اسلحے سمیت فرار ہوگیا ہے جس کی گرفتاری کے لیے 4 ٹیمیں تشکیل دے دی گئی ہیں۔
تحقیقات کے دوران انکشاف ہوا کہ ملزم نکہل نے 2018ء میں اپنے چھوٹے بھائی نیشو پر بھی فائرنگ کی تھی، پولیس اس معاملے کی مزید تفتیش کررہی ہے۔