حکومت بلوچستان اور دھرنا کمیٹی کے درمیان کامیاب مذاکرات کے بعد دھرنا ختم کر دیا گیا جبکہ شہداء کی میتوں کو کوئٹہ سے زیارت منتقل کرنے کا عمل شروع کیا جا رہا ہے۔
وزیراعلیٰ بلوچستان کے مشیر اطلاعات شاہد رند نے بتایا کہ وزیراعلیٰ میر سرفراز بگٹی کی ہدایت پر شہداء کی میتوں کی باعزت منتقلی کے لیے خصوصی انتظامات کیے گئے ہیں۔ ان کا کہنا تھا کہ میتوں کی منتقلی کے لیے ایمبولینسز، سیکیورٹی اور دیگر تمام ضروری سہولیات فراہم کر دی گئی ہیں تاکہ یہ عمل پرامن اور باوقار انداز میں مکمل ہو سکے۔
شاہد رند کے مطابق حکومت بلوچستان اور دھرنا کمیٹی کے درمیان مذاکرات خوشگوار ماحول میں ہوئے، جن میں تمام معاملات باہمی اتفاق رائے سے طے پا گئے۔ انہوں نے کہا کہ معاہدے میں شامل نکات پر فوری طور پر عملدرآمد کا آغاز کر دیا گیا ہے۔
انہوں نے مزید کہا کہ حکومت بلوچستان شہداء کے اہل خانہ کے غم میں برابر کی شریک ہے اور ان کے مسائل کے حل، عزت و احترام اور فلاح و بہبود کے لیے ہر ممکن اقدامات جاری رکھے جائیں گے۔ ان کے بقول شہداء کی قربانیاں پوری قوم کے لیے باعث فخر ہیں اور حکومت ان کے لواحقین کو ہر ممکن سہولت فراہم کرنے کے لیے پرعزم ہے۔