چیف جسٹس پاکستان جسٹس یحییٰ آفریدی کی زیرِ صدارت جوڈیشل کمیشن کا اہم اجلاس آج منعقد ہوگا جس میں سندھ، اسلام آباد اور پشاور ہائیکورٹس میں ایڈیشنل ججز کی تعیناتی اور مستقلی سے متعلق اہم امور کا جائزہ لیا جائے گا۔
ذرائع کے مطابق سندھ ہائیکورٹ میں پانچ ایڈیشنل ججز کی تعیناتی سے متعلق اجلاس دوپہر 2 بجے ہوگا۔ اجلاس میں دو ایڈیشنل ججز کو مستقل کرنے اور آئینی بینچز کی مدت میں توسیع کی تجویز پر بھی غور کیا جائے گا۔
اسلام آباد ہائیکورٹ میں تین ایڈیشنل ججز کی تعیناتی سے متعلق اجلاس دوپہر 3 بجے منعقد ہوگا، جبکہ پشاور ہائیکورٹ میں پانچ ایڈیشنل ججز کی تعیناتی کے معاملے پر اجلاس شام 4 بجے ہوگا۔
جوڈیشل کمیشن کے ایجنڈے میں پشاور ہائیکورٹ کے دو ایڈیشنل ججز کو مستقل کرنے کا معاملہ بھی شامل ہے جس پر اجلاس کے دوران غور کیا جائے گا۔ توقع ہے کہ اجلاس میں ہونے والے فیصلوں سے مختلف ہائیکورٹس میں عدالتی امور کو مزید مؤثر بنانے میں مدد ملے گی۔