اسلامی جمہوریہ ایران کے وزیر داخلہ اسکندر مومنی نے جنرل ہیڈکوارٹرز راولپنڈی میں فیلڈ مارشل سید عاصم منیر سے ملاقات کی۔
پاک فوج کے شعبۂ تعلقاتِ عامہ کے مطابق ملاقات کے دوران باہمی دلچسپی کے امور، علاقائی و دوطرفہ سلامتی، مؤثر سرحدی انتظام اور دونوں ممالک کے درمیان تعاون کے مختلف پہلوؤں پر تفصیلی تبادلہ خیال کیا گیا۔
ایرانی وزیر داخلہ اسکندر مومنی نے خطے میں کشیدگی کم کرنے، امن کے فروغ اور سفارتی سطح پر مؤثر کردار ادا کرنے کے لیے پاکستان کی مسلسل کوششوں اور اہم سفارتی کردار کو سراہا۔
ملاقات کے اختتام پر دونوں جانب سے علاقائی سلامتی، مشترکہ خوشحالی اور باہمی تعاون کو مزید مضبوط بنانے کے لیے قریبی رابطے اور مؤثر تعاون کے نظام کو برقرار رکھنے کے عزم کا اعادہ کیا گیا۔