پاکستان تحریک انصاف کے چیئرمین بیرسٹر گوہر نے نورین نیازی کے متنازع بیان سے لاتعلقی کا اظہار کرتے ہوئے کہا ہے کہ یہ ان کی ذاتی رائے ہے، اسے پارٹی پالیسی نہ سمجھا جائے۔
راولپنڈی میں میڈیا سے گفتگو کرتے ہوئے بیرسٹر گوہر نے کہا کہ اللہ تعالیٰ نے معرکۂ حق میں پاکستان کو بھارت کے خلاف تاریخی کامیابی عطا کی اور اگر دشمن نے دوبارہ کسی جارحیت کی کوشش کی تو اسے پہلے سے بھی زیادہ سخت جواب دیا جائے گا۔
انہوں نے عوام سے اپیل کی کہ مسلح افواج کی قربانیوں اور شہداء کے حوالے سے غیر ذمہ دارانہ بیانات سے گریز کیا جائے اور اس معاملے پر محتاط طرزِ عمل اختیار کیا جائے۔
بیرسٹر گوہر کا کہنا تھا کہ قومی مفاد کو ذاتی مفادات پر ترجیح دینا وقت کی ضرورت ہے، کیونکہ اسی صورت میں ملک مضبوط ہو سکتا ہے۔ انہوں نے کہا کہ ماضی کے معاملات کو دوبارہ چھیڑنے کے بجائے آگے بڑھنے پر توجہ دی جانی چاہیے۔
آزاد کشمیر کے انتخابات سے متعلق گفتگو کرتے ہوئے انہوں نے کہا کہ انتخابات کا شیڈول تبدیل کرکے انہیں تین مراحل میں تقسیم کر دیا گیا ہے، تاہم پی ٹی آئی کا آزاد کشمیر کے انتخابات کے بائیکاٹ کا فیصلہ تاحال برقرار ہے۔