حکومت کے ساتھ کامیاب مذاکرات کے بعد آل پاکستان پیٹرول پمپ اونرز ایسوسی ایشن اور دیگر ڈیلرز ایسوسی ایشنز نے اپنی مجوزہ ہڑتال مؤخر کرنے کا باقاعدہ اعلان کردیا ہے۔
مذاکرات کی کامیابی پر وفاقی وزیر پیٹرولیم علی پرویز ملک نے پیٹرولیم تنظیموں کا شکریہ ادا کرتے ہوئے کہا کہ حکومت عوام کو درپیش مشکلات سے مکمل طور پر آگاہ ہے۔
انہوں نے بتایا کہ خطے کی موجودہ اور بحرانی صورتحال کے پیش نظر عوام کو ریلیف فراہم کرنے کے لیے اب تک کئی سو ارب روپے کی سبسڈی دی جا چکی ہے جبکہ ایک جامع اور مؤثر ٹارگٹڈ سبسڈی کا نظام بھی وضع کیا گیا ہے۔
وزیر پیٹرولیم نے اس بات پر بھی زور دیا کہ بحران سے نمٹنے کے لیے آئل ریفائنریز اور پیٹرولیم ڈیلرز نے حکومت کے ساتھ بھرپور اور تعاون پر مبنی کردار ادا کیا ہے۔