پاکستان سمیت آٹھ عرب اور اسلامی ممالک نے مسجد اقصیٰ میں اسرائیلی وزرا اور آبادکاروں کی اشتعال انگیز کارروائیوں کی سخت مذمت کرتے ہوئے انہیں بین الاقوامی قوانین اور تاریخی حیثیت کی خلاف ورزی قرار دیا ہے۔
پاکستان، مصر، ترکیے، انڈونیشیا، اردن، قطر، سعودی عرب اور متحدہ عرب امارات کے مشترکہ اعلامیے میں مسجد اقصیٰ کے احاطے میں اسرائیلی جھنڈا نصب کرنے اور اسرائیلی وزرا کی فوج کی حمایت سے کی گئی اشتعال انگیز کارروائیوں پر شدید تشویش کا اظہار کیا گیا۔
اعلامیے میں کہا گیا کہ اسرائیلی پولیس نے مسجد اقصیٰ کے صحن میں ٹینٹ نصب کیے اور دیگر اقدامات کے ذریعے مقدس مقام کی حرمت کو پامال کیا، جبکہ مسلمانوں کی عبادت میں رکاوٹ ڈالنے اور بیت المقدس کے قدیم شہر تک رسائی پر عائد پابندیاں فوری ختم کرنے کا مطالبہ کیا گیا۔
مشترکہ اعلامیے میں زور دیا گیا کہ مقبوضہ مشرقی بیت المقدس کا تاریخی، قانونی اور آبادیاتی تشخص تبدیل کرنے کی اسرائیلی کوششیں ناقابل قبول ہیں۔ اعلامیے کے مطابق مسجد اقصیٰ کا پورا 144 دونم رقبہ صرف مسلمانوں کی عبادت گاہ ہے اور اس کے انتظامی اختیارات صرف اردن کے محکمہ اوقاف کے پاس ہیں۔
آٹھوں ممالک نے عالمی برادری سے مطالبہ کیا کہ وہ اسرائیل کو بیت المقدس کے اسلامی اور مسیحی مقدس مقامات پر غیرقانونی اقدامات سے روکنے کے لیے مؤثر کردار ادا کرے۔