امریکی صدر ڈونلڈ ٹرمپ نے جنگی اسلحے کی کمی سے متعلق میڈیا رپورٹس کو مسترد کرتے ہوئے کہا ہے کہ امریکا کے پاس دنیا کے کسی بھی ملک سے زیادہ اسلحہ موجود ہے۔
دی وال اسٹریٹ جرنل کو دیے گئے ایک بیان میں صدر ٹرمپ نے کہا کہ امریکا نہ صرف اپنی ضرورت کے مطابق بلکہ اس سے کہیں زیادہ جنگی اسلحہ رکھتا ہے۔
یہ بیان اس وقت سامنے آیا جب اخبار نے اپنی ایک رپورٹ میں دعویٰ کیا تھا کہ نائب صدر جے ڈی وینس اور جوائنٹ چیفس آف اسٹاف کے چیئرمین جنرل ڈین کین نے وائٹ ہاؤس کو ایران کے ساتھ جاری تنازع کے دوران فضائی دفاعی نظام میں استعمال ہونے والے انٹرسیپٹر میزائلوں کے ذخائر میں کمی سے متعلق بریفنگ دی تھی۔
رپورٹ کے مطابق مذکورہ بریفنگ کے بعد امریکی صدر نے ایران کے خلاف تقریباً دو ہفتوں سے جاری فوجی کارروائیاں روکنے کا فیصلہ کیا۔
ٹرمپ نے ان اطلاعات کو مسترد کرتے ہوئے واضح کیا کہ امریکا کی دفاعی صلاحیت مکمل طور پر برقرار ہے اور ملک کو اسلحے کی کمی کا کوئی مسئلہ درپیش نہیں۔