پشاور کے علاقے خزانہ میں میٹرک کے سالانہ امتحان میں توقع سے کم نمبر آنے کے بعد ایک طالبعلم کی مبینہ طور پر خودکشی کا واقعہ پیش آیا، جس پر پولیس نے روزنامچہ درج کرکے مزید تحقیقات شروع کردی ہیں۔
پولیس کے مطابق واقعہ تھانہ خزانہ کی حدود میں پیش آیا، جہاں عزیر نامی طالبعلم اپنے گھر کے ایک کمرے میں مردہ حالت میں پایا گیا۔ اطلاع ملنے پر پولیس موقع پر پہنچی، ضروری شواہد اکٹھے کیے اور قانونی کارروائی کا آغاز کر دیا۔
پولیس کا کہنا ہے کہ متوفی کے والد نے اپنے بیان میں بتایا کہ گزشتہ روز ثانوی تعلیمی بورڈ کی جانب سے میٹرک کے سالانہ امتحانات کے نتائج کا اعلان کیا گیا تھا۔ ان کے مطابق عزیر نتائج میں توقع سے کم نمبر آنے پر ذہنی دباؤ اور شدید رنج کا شکار تھا، اور ابتدائی طور پر یہی واقعے کی ممکنہ وجہ سامنے آئی ہے۔