لاہور کے تھانے میں ذہنی معذور لڑکی سے مبینہ زیادتی کے مقدمے میں گرفتار اور معطل پولیس اے ایس آئی عمران کو عدالت نے چار روزہ جسمانی ریمانڈ پر پولیس کے حوالے کردیا۔
کینٹ کچہری لاہور میں جوڈیشل مجسٹریٹ ارم یوسف کے روبرو ملزم کو پیش کیا گیا، جہاں تھانہ غازی آباد کے تفتیشی افسر نے مؤقف اختیار کیا کہ ملزم سے مزید تفتیش اور واقعے کی تفصیلات حاصل کرنے کے لیے 14 روزہ جسمانی ریمانڈ درکار ہے۔
عدالت نے فریقین کے دلائل سننے کے بعد پولیس کی 14 روزہ جسمانی ریمانڈ کی استدعا مسترد کرتے ہوئے ملزم عمران کو چار روزہ جسمانی ریمانڈ پر پولیس کی تحویل میں دے دیا۔
پولیس کے مطابق دورانِ ریمانڈ ملزم سے واقعے کے مختلف پہلوؤں پر تفتیش کی جائے گی، جبکہ تحقیقات مکمل ہونے پر پیش رفت سے عدالت کو آگاہ کیا جائے گا۔