آج کا دن ہمارے لیے بہت بڑا ہے کیونکہ ہمارے بیٹے نے امتحان میں دوسری پوزیشن حاصل کر کے ہمارا سر فخر سے بلند کردیا ہے، یہ کہنا ہے لاہور کے طالب علم محمد بلال بیگ کے والد کا جو کباڑیے کا کام کرتے ہیں اور انہوں نے بہت محنت کے ساتھ اپنے بیٹے کو پڑھایا لکھایا ہے۔
بلال نے بتایا کہ ان کے والدین انہیں پڑھنے میں بہت سپورٹ کرتے ہیں۔ طالب علم کا کہنا تھا کہ انہوں نے پانچویں کلاس کے بعد گیپ لیا تھا جس دوران انہوں نے حفظ قرآن کی تعلیم حاصل کی تھی اور پھر تین سال بعد نویں کلاس میں داخلہ لیا اور پھر میٹرک میں آکر خوب محنت کے بعد پوزیشن حاصل کی۔
بلال نے بتایا کہ وہ آگے مزید محنت کے ساتھ اپنی تعلیم جاری رکھنا چاہتے ہیں اور آگے چل کر اپنے والدین کی ہر خواہش کو پورا کرنا چاہتے ہیں۔ بلال نے مزید بتایا کہ والد صاحب کے ساتھ کام کرنے والا ایک ملازم اچانک چلا گیا تھا جس کے بعد میں نے امتحان کے دنوں میں والد کا کام میں ہاتھ بٹایا۔ امتحان میں دوسری پوزیشن حاصل کرنے والے بلال نے بتایا کہ وہ مستقبل میں آئی سی ایس (کمپوٹر سائنس فیلڈ) میں جانے کا ارادہ رکھتے ہیں۔